මංගල දිනයට සූදානම් වීමේදී කල්වේලා ඇතිව කළයුතු බොහෝ දේ ගැනත් කල් ඇතිව සූදානම්වීමේ වැදගත්කම ගැනත් අප ගිය සතියේ කතා කළා. මේ සෑම දෙයක් වගේම මනමාලිට මංගල සාරි තෝරා ගැන්මේ කාර්යයත් හරිම වැදගත්. විශේෂයෙන්ම මෙහිදී සාරි වර්ණ ගැන සැලකිලිමත් විය යුතුයි. මනමාලියට හා මනාලියගේ යෙහෙළියට ගැළපෙන වර්ණ තෝරා ගැනීම ගැන අපි අද කතා කරමු.

මනාලිය වන ඔබ තෝරා ගන්නේ උඩරට ඔසරිය නම් ඔබට වඩා සුදුසු වර්ණ මොනවාද? ඇත් දළපාට (අයිවරි), සුදුපාට, බිස්කට් වර්ණය (බිස්කට් කලර්), රන්පාට (ගෝල්ඩ් කලර්), මුතු වර්ණය (පර්ල් වයිට්), සීනි සුදු (සුගර් වයිට්) මෙම වර්ණවලිනුත් තමාගේ සමට ගැළපෙන වර්ණ තෝරාගත යුතුයි. මෙහිදී තමාගේ කැමැත්ත ද තිබිය යුතුයි. සාමාන්‍යයෙන් ඔසරියෙන් සැරසෙනවා නම් වැඩියෙන්ම ගැළපෙන්නේ ඇත්දළ වර්ණයයි. බිස්කට් වර්ණ, රන් පැහැය ද වඩාත් ගැළපෙයි. විශේෂයෙන්ම අපේ කාන්තාවන් බොහෝ දෙනකුගේ සම රන්වන් පාට තළෙලු ගතියකින් යුක්තයි. එම නිසා ඉහත කී වර්ණ වඩාත් හොඳින් ගැළපෙයි. 

එමෙන්ම සාරි වර්ග ගැන සිතුවොත් උඩරට ක්‍රමයට වඩාත් ගැළපෙන්නේ කෝරා සිල්ක්, මනිපූර්, බ්‍රොකේට් ආදී වර්ගයි. නෙට් වර්ගයේ හා සිල්ක් වර්ග මිශ්‍ර සාරි ද තෝරාගත හැකියි. සාමාන්‍යයෙන් ඉදිරි පොටට හොඳ වැඩ දැමීමක් තිබීම ද වැදගත්. උඩරට සාරිය තෝරාගන්නේ නම් එය නිතරම මනාලිය කෙරෙන් ගාම්භීරත්වයක් පළ කෙරෙන අයුරින් තෝරා ගන්න. සමහර අය රිදීපාට වැඩ දැමූ සාරි ඇඳීමට පි‍්‍රය කරති. මේ සඳහා ද සුදු වර්ණ සුගර් වයිට්, ඕල්ඩ් වයිට් වැනි වර්ණ ගැළපේ. ඒ වගේම ඉහත සඳහන් වර්ගයේ සාරි ද තෝරාගත හැකියි. මෙහිදී තමන්ගේ ශරීරයේ ස්වභාවය අනුව සාරි වර්ණය තීරණය කරන්න. සිහින් උස සිරුරක් ඇත්නම් කෝරා සිල්ක්, මනිපූර් ද තරමක් මහත සිරුරක් නම් ඉටලියන් සිල්ක් නෙට් වර්ග වඩාත් ගැළපෙයි. නමුත් සමහර අය සම්පූර්ණ සාරිය සාප්පුවෙන් මිල දී ගෙන පසුව ඔසරිය ලෙස කපා සකස් කරගනියි. එවිට ශරීරයේ හැඩය මනාව පවත්වා ගැනීමටත් පහසු වේ. එමෙන්ම එය අඳින ඔබටත් පහසුවක් දැනෙයි. තවත් සමහර අය සම්පූර්ණ සාරියම අඳිනවා. ඒ දෙකම ලස්සනයි. නමුත් වඩාත් පහසු මේඩ්අප් කැන්ඩියන් එකයි. සමහර අය ඔසරිය වෙඩින් එකටත් හෝම් කමින් එකටත් ගොයින්අවේ එකටත් අඳින අවස්ථා තිබෙයි. හෝම් කමිං වර්ණ ගැන කතා කළොත් සාම්ප්‍රදායික වර්ණ ලෙස රතුපාට සැලකිය හැකියි. නමුත් සමහරුන් එයට වඩා වෙනස් වර්ණවලින් ද හැඩවීමට කැමැත්තක් දක්වයි. (තැඹිලි පාට තද කුණු ලේ පාට) ගොයිනවේ සඳහා උඩරට ඔසරිය අඳිනවා නම් තමන්ට කැමැති වර්ණයක් තෝරාගත හැකියි. ඕනෑම නිර්මාණයක් වුවත් තෝරා ගැනීමට නිදහස තිබේ. (නිල්, රෝස, රත්, තැඹිලි) දැන් බොහෝමයක් එන සාරිවල ස්ටෝන් වර්ක්, සීකුවින්ස් වර්ක් තිබෙයි. ලස්සන දිලිසෙන සාරිවලට බොහෝ දෙනෙක් කැමැතියි. මෙහිදී තමන්ට වැයකළ හැකි මුදල ගැන සැලකිලිමත්වීම ද වැදගත්ය. දෙවැනි මනාලියගේ වර්ණ තේරීම ද මෙහිදී වඩාත් වැදගත් වෙයි. බොහෝවිට උඩරට ක්‍රමයට සැරසෙන දෙවැනි මනාලියට ගැළපෙන වර්ණ ලෙස තැඹිලි පාට, පීච්, මැජෙන්ටා, ළා නිල්, තද නිල්, සැමන් පින්ක්, බේජ්, කහ පාට, කුණු ලේ පාට, ළා දම්, ගෝල්ඩ් වැනි වර්ණ තෝරාගත හැකි අතර එම වර්ණ මිශ්‍රකර හෝ විවිධ ආකාරයෙන් නිර්මාණය කරගත හැකියි. මෙහිදී ඔබ තෝරා ගන්නා රූපලාවණ්‍ය ශිල්පියා හෝ ශිල්පිනියත් ඇඳුම් නිර්මාණය ගැන මනා අවබෝධයකින් කටයුතු කළ යුතුයි. එවිට කිසිදු අඩුපාඩුවකින් තොරව මංගල ඇඳුම් සකසා ගන්නට ඔබට හැකිවේවි.

උපදෙස් - ප්‍රවීණ රූපලාවණ්‍ය ශිල්පිනී චාන්දනී බණ්ඩාර

ලිව්වේ මංජුලා මල්කාන්ති
උපුටා ගැනීම තරැණි පුවත්පත