පුංචි ඉඩමකට තනි මහලේ සොඳුරු නිවෙසක්

අපි හැමදාම කතා කරනවා වගේම නිවෙසක් හදන්න ලැබෙන ඉඩකඩ තමන්ගේ අවශ්‍යතාවලට අනුව නිවැරැදිව භාවිත නොකළහොත් වෙන්නේ පාඩුවක්. ඒ වගේම ජීවිත කාලයම පසු තැවෙන්නත් එය හේතු වෙන්න පුළුවන්. 

ඉඩම කුඩා යැයි කියා දෙමහල් නිවෙස්ම තනන්න අවශ්‍ය නැහැ. නිවෙසට වැය කරන මුදල අවම කර ගනිමින් තනි මහලේ නිවෙසින් සියලු අවශ්‍යතා සපිරෙන ලෙසට සැලසුම් කර ගත හැකියි. 

අද අපි ඔබට ගෙන එන නිවෙස එවැනි අවශ්‍යතා සපිරෙන ලෙස පර්චස් 9ක පමණ ඉඩකටයි සැලසුම් කර තිබෙන්නේ. නිවෙසේ එක් දිගු මායිමක් මායිම් බිත්තියක් (Bind Wall)  ලෙස යොදාගෙන ඇති අතර අනෙක් පසින් ඉදිරි පසින් හා පසුපසින් සැලකිය යුතු ඉඩකඩක් ඉතිරි කර තිබෙනවා. 

මායිම් බිත්තියට යාබදව වාහන නැවතුම (Car Port) ස්ථාන ගත කර ඇති අතර එයට යාව ඇති වැරැන්ඩාවකින් නිවෙස තුළට පිවිසිය හැකියි. ප්‍රධාන සාලය හා කෑම සාලය එකම අවකාශයේ පිහිටා තිබෙනවා. එසේම මුළුතැන්ගෙය (Kitchen)  නිවෙසේ පසුපස කොටසට ගෙන නොගොස් නවීන පෙනුමක් ලැබෙන පරිදි කෑම සාලයට විවර වන ලෙස පිහිටුවා තිබෙනවා. 

නිවෙසේ ප්‍රධාන නිදන කාමරය යාබද නාන කාමරයක් (Attached Bath Room) සමඟින් සැලසුම් කර තිබෙනවා. එසේම පොදු නිදන කාමර දෙකම සැලකිය යුතු ඉඩක් සහිතව පිහිටුවා තිබීම මඟින් මෙවැනි නිවෙසකදී නිවැසියන්ට ගෙන එන පහසුව ඉමහත්. ඉන් එක් නිදන කාමරයකට ආසන්නයේම පොදු නාන කාමරය පිහිටුවා තිබීමෙන් යාබද නාන කාමරයක පහසුව ඔවුන්ට අත්විඳිය හැකියි. මුළුතැන්ගෙයින් මිදුලට පිවිසීමට හැකි නිසාත් එම දිශාවේ සැලකිය යුතු ඉඩක් තබා ඇති නිසාත් අවශ්‍යතා සඳහා ඉතාම වැදගත් වේවි. 

පර්චස් 9ක් වැනි ඉඩකඩක් මනාව කළමනාකරණය කිරීමෙන් සැලසුම් කර ඇති මේ සොඳුරු නිවෙසේ සම්පූර්ණ වර්ග අඩි ප්‍රමාණය 1250ක් පමණ වෙනවා. වැඩ අවසන් කරන්න වැයවන මුදල මිලියන 3.8ක් පමණ වේවි. 

කුඩා ඉඩක තනි මහලේ සුවපහසු නිවෙසක් ගැන හීන දකින ඔබට මේ සැලසුම ඉතා හොඳ ආලෝකයක් වේවි.

උපුටා ගැනීම මවුබිම