මල් වගා කරන ගෘහණියන්ට නැතිවම බැරි ඇග්ලෝනිමා
ඇග්ලොනිමා වර්ග :
මෙම ඇග්ලොනිමා පැළ විවිධ වර්ණවලින් දැකිය හැකිය. මේවායේ ඉතාම විසිතුරු වර්ණ අද වන විට ලෝකයේ විවිධ රටවල නිපදවා ඇත. මේ අතරින් වඩාත්ම ප්‍රචලිතව ඇත්තේ කොළ හා රතු වර්ණය සහිත ඇග්ලොනිමා ශාකයයි. රතු වර්ණය සහිත ඇග්ලොනිමා ශාක ‘නියම්’ ලෙසද, කොළ හා සුදු වර්ණ සහිත ශාක අඥඤ ඕභබබඥපටතර ලෙසද හඳුන්වන අතරම ඇනියමන් ලෙස හඳුනා ගන්නේ කොළ පැහැති පත්‍රයක රතු තිත් ආකාරයෙන් දිස්වන ශාකයන්ය. ශ්‍රී ලංකාවේ වගාකරුවන් අතර වැඩි වශයෙන්ම දක්නට ලැබෙන්නේ ඉහත කී වර්ගවල ඇග්ලොනිමා ශාකය.
ජල සම්පාදනය :
අප කලින් සඳහන් කළ පරිදි ඇග්ලොනිමා ශාකය ජලයට සංවේදිතාවක් දක්වන නිසාම ජලය යෙදීමේදී වඩාත් සැලකිලිමත් විය යුතුය. මන්ද ශාකයේ මූල පද්ධතිය ජලය බැස නොයන ආකාරයට පැවැතුණහොත් ඉතාමත් ඉක්මනින් දිලීර ආසාදනයන්ට ලක්වන බැවිනි. නමුත් මින් හැඟවෙන්නේ ශාකයට ජලය අවශ්‍ය නොවන බව නොවේ. එනම් මනා ජල සම්පාදනයකින් පසු ඉතාමත් හොඳින් වියළන ලද ජලය බැසයන මාධ්‍යයක පැළය සිටුවිය යුතු බවය.
වැලි සහිත මාධ්‍ය :
මීළඟට පැනනඟිනුයේ මෙවන් වූ මාධ්‍යයක් අප සකස් කර ගන්නේ කෙසේද? යන්නය. මේ සඳහා ඔබ තෝරා ගත යුතු වන්නේ හොඳින් ජලය බැස යන මාධ්‍යයකි. එලෙස ජලය නොරැඳීමට නම් වඩාත් සුදුසු වන්නේ වැලි සහිත මාධ්‍යයකි. මෙම වැලි කැට අතරින් ඇති සවිවර සිදුරු තුළින් ජලය පහළට බැසයන නිසා ඉක්මනින් ජලය මාධ්‍යයෙන් ඉවත් වේ.
මාධ්‍ය සකස් කර ගැනීම :
ඇග්ලොනිමා ශාකය සඳහා හොඳ මාධ්‍යයක් සාදා ගැනීමට නම් ගංගා වැලි 1කට කොම්පෝස්ට් එකක් මිශ්‍රකර මෙයටම හලාගත් (කෙඳි ඉවත් වන සේ) කොහුබත් 1/4ක් මිශ්‍ර කරගත හැකිය. මේ ආකාරයට සාදා ගත් මාධ්‍යයේ දැන් පැළ සිටුවා ගැනීම කළ හැකිය.
පැළ නිපදවා ගැනීම :
ලංකාවේ දැනටමත් පටක රෝපණ විද්‍යාගාර තුළ මෙම ඇග්ලොනිමා වර්ගයේ කුඩා පැළ නිර්මාණය කර ඇත. එසේම විශාල පැළද මිලදී ගත හැකිය. විශාල පැළයක් ඔබ මිලදී ගන්නේ නම් ඒවා හොඳ විශාල බඳුනක් තුළ සිටුවා ගැනීමෙන් පැළය වැඩෙන විට කඳන් කපා නව පැළ බෝකර ගැනීමේ හැකියාව ඇත. පැළයේ අග්‍රස්ථ කොටස කපා සිටුවා ගත් විට පාදස්ථයෙන් අලුත් පැළ වර්ධනය වේ. මේවා ක්‍රමානුකූලව වෙන්කර ගැනීමෙන් නව පැළ නිපදවා ගැනීමට හැකිය.
පොහොර භාවිතය හා ස්ථානගත කිරීම :
මෙම ඇග්ලොනිමා වර්ගයේ ශාක පොහොරවලට ඉතාම සංවේදී බවක් පෙන්වයි. මෙනිසා නයිට්‍රජන් පොහොර ඉතා ඉක්මනින් උරාගන්නා ආකාරයක් දැකීමට පුළුවන. එසේම මෙම පැළ ස්ථාන ගත කිරීමේදී පත්‍ර එකිනෙක ගැටෙන ආකාරයෙන් නොතැබීමට වගබලා ගන්න. පත්‍ර එකිනෙක ගැටෙන පරිදි නොතබා යම් මට්ටමකින් දුරස්ව තැබීමෙන් පත්‍ර එකිනෙක ගෑවී ඇතිවන තෙතමනය වළක්වා ගත හැකිය. එමඟින් පත්‍ර අතර ඇතිවන දිලීර ආසාදන බොහෝ සෙයින් වැළකෙයි.
ආලෝක පාලනය :
විවිධ වර්ණවලින් විසිතුරුව වැඩෙන මෙම ඇග්ලොනිමා ශාකයට මනා පාලනයකින් යුතුව ආලෝකය ලබාදිය යුතුය. එසේම මේවායේ වර්ණ නිවැරැදිව පවත්වාගෙන යෑම සඳහා ආලෝක පාලනය කිරීම වැදගත්ය. එනම් 50%ක සෙවණ දැලක් භාවිත කිරීමෙන් නියම ප්‍රශස්ත වර්ණයෙන්ම පැළ ලබා ගත හැකිය.
වෙළෙඳපොළ :
සාමාන්‍යයෙන් මධ්‍යම මට්ටමෙන් වර්ධනය වූ (රූපයේ පෙනෙන ආකාරයේ) පැළයක් වෙළෙඳපොළේ රු. 350ට පමණ මිලකට අලෙවි වේ. මෙලෙස රු. 350කට පමණ මුදලකට පැළයක් මිලදී ගෙන තවත් වර්ධනය වන විට එහි කඳ කපා තවත් පැළ 2ක් පමණ ඉන් ඔබටම නිර්මාණය කර ගැනීමට පුළුවන. මේ ආකාරයට තවත් කුඩා පැළ නිර්මාණය කර ගැනීමෙන් එක් පැළයක් රු. 200ක් වැනි මුදලකට අලෙවි කිරීමට හැකිවීමද පහසුවකි. මෙහි ඇති තවත් විශේෂත්වයක් වන්නේ පැළය ඉක්මනින් ලියලා වර්ධනය වීමයි. එමඟින් තමන්ට කුඩා පැළ සංඛ්‍යාවක් විශාල පැළ ගොනුවකට පැළ සකස් කරගෙන තමන්ගේ ආර්ථිකය ශක්තිමත් කර ගැනීමට මං විවර කර ගැනීමේ හැකියාව ඔබටද හිමිවනු ඇත.
මහින්ද දිසානායක ඇන්තූරියම් හා ඕකිඩ් වගා උපදේශක ඉසුරු ප්ලාන්ට් අධිපතිශාලිකා රංගනී සමරදිවාකර
උපුටා ගැනීම මව්බිම පුවත්පත
