මට හැදුන එකම ගොසිප් එක ඇත්තක් වෙන්නයි යන්නේ

පුංචි තිරයෙන් කලාවට පිවිසිලා ඉතාම කෙටි කාලයක් තුළ ලංකාවේ ජනප්‍රිය නිළියක් උනු කෙනෙක් තමයි පූජනී භාග්‍යා කියන්නේ. පසුගිය මාර්තු මාසයේ තිබුණු රයිගම් සම්මාන උළෙලේ 2023 වසරේ විශිෂ්ටම ටෙලිනාට්‍ය සහාය නිළිය විදිහට ඇයට නිර්දේශ නාමයන් අතරට එකතුවෙන්න ලැබුණෙත් ඒක නිසා. මේ අතර ඇයගේ විවාහය ගැනත් දැන් දැන් කලා ක්ෂේත්‍රයේ විවිධ ආරංචි යනවා. ඒ හැමදේම ගැන අහන්නයි අපි මෙදා සැරේ පූජනී භාග්‍යාට කතා කළේ.

මෙවර රයිගම් සම්මාන උළෙලේදි පූජනී 2023 වසරේ විශිෂ්ටම ටෙලිනාට්‍ය සහාය නිළිය විදිහට නිර්දේශ වුණා. අපි එතැනින්ම කතාබහ පටන්ගමු නේද?

ඔව්. ඒ ගැන නම් හරිම ලොකු සතුටක් තියෙන්නේ.මගේ රංගන ජීවිතය තුළ පළවෙනි වතාවටයි මේ වගේ විශිෂ්ට සම්මානයක් වෙනුවෙන් මම නිර්දේශ වුණේ. ඒ ස්වර්ණවාහිනී නාළිකාව තුළ විකාශනය උනු "මැස්සා" ටෙලිනාට්‍යයේ මං කරපු "පිංකි" චරිතය වෙනුවෙන්.

සම්මාන උළෙලෙදි එම සම්මානය නොලැබුණත් නිර්දේශ වූ එකට පූජනීට සතුටු ඇති?

අනිවාර්‌යෙන්ම. සම්මානය නොලැබුණත් නිර්දේශිත නාම අතරට එක්වීමත් මට නම් සම්මානය ලැබුණා වගේ තමයි. ඒ නිසා සම්මානය නොලැබීම ගැන කිසිම දුකක් හෝ කනගාටුවක් නෑ.

මේ දවස්වල ඔබේ රංගන කටයුතු එහෙම කොහොමද?

රංගන කටයුතු ගැන කිව්වොත් ඉතින් සුපුරුදු විදිහට ටෙලිනාට්‍යය කිහිපයක රූගතකිරීම් කරගෙන යනවා. ඉදිරියේදී ඒවා විකාශනය වෙයි.

දැන් නම් ඉස්සර වගේ බලු පැටව් පූස් පැටව් ගෙදර ගෙනැත් බලාගන්නේ නැතුව ඇති?

දැන් ර‍ංගන වැඩකටයුතු එක්ක ටිකක් කාර්යබහුලයිනේ. ඒ නිසා ලොකුවට ඒ දේවල් කරන්නේ නෑ. ඇයි ඉතින් ගෙනාවා වගේ නෙවෙයි උන් ගැන බලන්න වෙලාවක් නෑනේ. හැබැයි කලින් ගෙනාපු අය තාම ගෙදර ඉන්නවා.

කලා ක්ෂේත්‍රයට ගොසිප්වලින් කිසි අඩුවක් නෑනේ. ගොසිප්වලට බයද?

ලොකුවට මට ගොසිප් හැදිලා නෑනේ. ඒ නිසා එහෙම බයක් නම් නෑ. මට හැදුනේ එක ගොසිප් එකයි. ඒ මං ගයාන් අයියා එක්ක කරපු වෙඩින් ෆොටෝ ෂූට් එකක් හින්දා. එදා ගොඩාක් අය හිතුවේ මමයි ගයාන් අයියයි බැඳලා කියලා. හැබැයි ඒ හැදුනු එකම ගොසිප් එකත් දැන් ඇත්ත වෙන්න යන්නේ.

ඒ කියන්නේ ළඟදිම පූජනී ගයාන් විවාහය වෙනවා. එහෙමද?

ඔව් ඔව්... ගොඩාක් දුරට මේ අවුරුද්දේ අන්තිම කාලේ හරි එන අවුරුද්දේ මුල හරි අපි විවාහ වෙයි.

විවාහයෙන් පස්සේ පූජනී රංගන ජීවිතේට සමුදෙන්න එහෙම හිතාගන ඉන්නවද?

අයියෝ එහෙම නම් අදහසක් නෑ. මගේ ආසාව දිගටම රඟපාන්න. විවාහ වුණා කියලා ඒ දේවල් ඉතින් නවත්තන්න ඕන නෑනේ.

ගයාන් කිව්වොත් පූජනී රඟපෑවා ඇති කියලා?

මං හිතලා එහෙම දෙයක් කළත් ගයාන් අයියා නම් කිසිම දවසක මට එහෙම දෙයක් කියන්නේ නෑ. ගයාන් අයියා මං රඟපානවට කැමැතියි.

රසිකයින් අතරින් එහෙම පූජනීට ආදර යෝජනා ඇවිත් නැද්ද?

එහෙම ආපු වෙලාවලුත් තියෙනවා. ඒත් දැන් මං ගයාන් අයියත් එක්කම ඉන්න හින්දා ඒ වගේ යෝජනා නම් කාලෙකින් ආවේ නෑ.

මේ වෙනකොට පූජනී වටා සෑහෙන ලොකු රසික රසිකාවියන් පිරිසක් ඉන්න බව පේනවා. මේ අලුත් අවුරුද්දේ ඔවුන් වෙනුවෙන් කියන්න දෙයක් තියෙනවද?

මේ හිටියා වගේම මගෙත් එක්ක ඉන්න කියලා තමයි කියන්න තියෙන්නේ. අනිත් දේ තමයි ඔවුන් මට කොච්චර ආදරෙයිද ඒ තරමටම මමත් ඔවුන්ට හරි ආදරෙයි.

උපුටා ගැනීම අරුණ