ඔත්තුකරුවා නැවත පැමිණෙයි - The November Man

ලෝක ප්‍රකට ජේම්ස් බොන්ඩ් චරිතය රිදී තිරය මත මැවී මේ වාසනාව ලබන්නට සමත් වූ නළුවන් ලොව සිටින්නේ කිහිප දෙනකු පමණි. ඒ අතරින් අයකු වූ අයර්ලන්ත ජාතික සිනමා නළු පියර්ස් බ්‍රොස්නන් 2005 වසරේදී ජේම්ස් බොන්ඩ් චරිතයෙන් සමුගත්තේය. කෙසේ වෙතත් ඔහු සිනමාවේ රඟපෑමෙන් විශ්‍රාම ගත්තේ නැත. පසුගිය අගෝස්තු 27 දා ලොව පුරා ප්‍රදර්ශනය ආරම්භ වූ ‘ද නොවෙම්බර් මෑන්’ චිත්‍රපටයේ ප්‍රධාන චරිතය රඟපාන්නේ පියර්ස් බ්‍රොස්නන්ය. එහිද ඔහු නිරූපණය කරන්නේ විශ්‍රාමික චරපුරුෂයකු‍ගේ චරිතයක් වුව එය ජේම්ස් බොන්ඩ් චරිතය නොවේ. රිචඩ් ඩොනල්ඩ්සන් ගේ අධ්‍යක්ෂණයක් වන ‘ද නොවෙම්බර් මෑන්’ සිනමා පටය සඳහා පාදක වී ඇත්තේ බිල් ග්‍රැන්ගර් අතින් ලියැවුණු ‘දෙයා ආ නෝ ස්පයිස්’ නවකතා ‍පොත් පෙළේ සත්වැන්නයි. එම සත්වන නවකතාව හැඳින්වී ඇත්තේ ද චිත්‍රපටයට යොදා ඇති නමින්මය. චිත්‍රපටය තිරගත වීම ඇරඹීමත් සමඟම නවකතාවේ නව මුද්‍රණයක් ද එළි දැක තිබේ. නවකතාව ඇසුරෙන් මයිකල් ෆින්ච් සහ කාර්ල් ගැඩුසෙක් චිත්‍රපටයේ තිර නාටකය ලියා ඇති අතර, බ්‍රොස්නන් චිත්‍රපටය නිෂ්පාදනයට එක්වූ කිහිප දෙනා අතරින් අයකු ද වෙයි. මෙම චිත්‍රපටයේ ප්‍රධාන චරිතය වන චරපුරුෂයා ඇමෙරිකානු මධ්‍යම රහස් ඔත්තු සේවයේ නැතහොත් සී.අයි.ඒ. හී සේවය කොට විශ්‍රාම ලැබූ අයෙකි. වි‍වේකීව විශ්‍රාමික ජීවිතය ගත කරමින් සිටින ඔහු හමුවට හදිසියේ පැමිණෙන ඉහළ සීඅයිඒ නිලධාරියකු පවසන්නේ රටට නැවතත් ඔහුගේ සේවය අවශ්‍ය වී ඇති බවයි. රහස් මෙහෙයුමට එක්වන විශ්‍රාමික චරපුරුෂයා ඉක්මනින්ම වටහා ගත්තේ තමාට සටන් කරන්නට සිදුවී ඇත්තේ තමා‍ගේම ශිෂ්‍යයාට එරෙහිව බවයි. එමෙන්ම එම මෙහෙයුම ඉහළ සීඅයිඒ නිලධාරීන් සහ ඡන්දයෙන් තේරී පත්වූ රුසියානු ජනාධිපතිවරයා ද සම්බන්ධ මෙහෙයුමක් බව ද ඔහු වටහා ගනියි. මෙහෙයුමක් ඇරඹූ චරපුරුෂයකුට ආපසු හැරීමක් නැත. ශිෂ්‍යයාට එරෙහිව ගුරුවරයා සටන් වදිතත් ශිෂ්‍යයා ගුරුවරයාට වඩා දක්ෂ බවක් ද පෙනී යයි. ත්‍රාසය හා කුතුහලය පිරි ක්‍රියාදාම චිත්‍රපටයක් වන ‘ද නොවෙම්බර් මෑන්’ හී රූගතකිරීම් පසුගිය වසරේ මැයි 13 දා බෙල්ග්‍රේඩ් හි දී ආරම්භ වී තිබේ. ‘ද නොවැම්බර් මෑන්’ ඩොලර් ලක්ෂ 150ක් වැය කොට තනා ඇති චිත්‍රපටයකි. මේ වන විට ඩොලර් ලක්ෂ 137ක ආදායමක් උපයා ඇති මෙම චිත්‍රපටය ඉහළ ආදායම් වාර්තා සහිත හොලිවුඩ් චිත්‍රපට ලැයිස්තුවේ පස්වන ස්ථානය මේ වන විට නියෝජනය කරමින් සිටියි. ජේම්ස් බොන්ඩ් චරිතය වඩාත් හොඳින් රිදී තිරයේ ප්‍රතිනිර්මාණය කළ නළුවකු ලෙස ප්‍රකට පියර්ස් බ්‍රොස්නන් ගේ රසිකයන් නැවත ඔහු චරපුරුෂයකු ලෙස රඟනු දැකගන්නට උනන්දු වන බවක් පෙනෙන්නට තිබේ. කුමාර සිරිවර්ධන උපුටා ගැනීම සිළුමිණ