කිලි ගැන නොවී සැලකිලි නොනගන්න මැසිවිලි

හිතවතකුගේ, ඥතියෙකුගේ මරණයක්‌, දැරියකගේ මල්වරවීමක්‌ ආරංචි වූ විගස අපේ මතකයට එන්නේ ගෙදර හතර කොණ වළලපු ආරක්‍ෂක මුට්‌ටි, පවුලේ සාමාජිකයන්ට පළඳපු ආරක්‍ෂක නූල්, යන්තර පිළිබඳවයි. අවමංගල උත්සවයට සල්ලි කීයක්‌ හරි දීල කනගාටුව ප්‍රකාශ කරමු. මල්වර උත්සවේට තෑග්ගක්‌ යවල එන්න බැරි බව දන්වමු. ඒ තම තමන්ගෙ වාසිය තකා කිල්ල ප්‍රයෝජනයට ගන්නා හැටියි.

ගෙදර හතර කොණ, ඉඩම හතර කොණ ආරක්‍ෂා කරලා, දියුණුවට, විවාහයට, අපලවලට යන්ත්‍ර පළඳවල දින 7 න් 14 න් 21 න් විශ්මිත ප්‍රතිඵල ලබල දෙනව කියල පොරොන්දු වෙලා විශාල ලෙස මුදල් ලබා ගත්ත බොරුකාර කට්‌ටඩි මහත්තයට ඇඟ බේර ගන්නත් මේව හොඳ අවස්‌ථාවල්. ඕක තමයි මම කිව්වේ කිලි අහුකර ගන්න එපා කියලා. මම මහන්සිවෙලා දාපු යන්තරෙන් දැන් වැඩක්‌ නැහැ. තව සුමාන තුනකින් විතර කිලි දෝෂ අයින් කරල දෙවියන්ට පූජාවක්‌ තියල කන්නලව් කරල ආපහු යන්තරේ දාමු. ඒ මන්ත්‍රකරුගේ වාසියට කිල්ල උපයෝගී කරගන්නා හැටිය.

දරුණු හදවත් රෝගියෙකුට වෛද්‍යවරයා උපදෙස්‌ දෙනවා තෙල් සහිත ආහාර, බැඳුම් වර්ග, මස්‌, බිත්තර චීස්‌ වගේ අධිපෝෂණයක්‌ ලැබෙන කෑම ටික දවසකට නවත්වන්න කියල. දේශීය වෛද්‍යවරයා එවැනි රෝගීන්ට උපදෙස්‌ දෙනව දිය කිරට උයපු එළවලුයි බතුයි කාල නියම කරන විදියට බෙහෙත් කසාය බොනකොට මේ ලෙඩේ ඇරෙයි කියල. ඒ අතර අප රටේ සුළු වශයෙන් සිටින යන්ත්‍ර මන්ත්‍ර කටයුතුවලින් මිනිසුන් නොරවටන දෛවඥයෙක්‌ විදිමත්ව රෝගියාගේ කේන්ද්‍රය පරීක්‍ෂාකර බලා යන්ත්‍රයක්‌ දාලා කියනවා මේකෙ බල බිඳ ගන්න එපා ඔයාල ගොඩක්‌ වියදම් කරල මම ගොඩක්‌ මහන්සිවෙලා දාපු යන්තරේ පරිස්‌සම් කරගන්න ඔය වගේ අමාරු ලෙඩ්ඩු කීප දෙනකුම මම භාරගෙනයි ඉන්නේ මස්‌, මාළු, බිත්තර තෙල් බැදුම් කාල ලෙඩේ වැඩිකරගෙන කිලි අහුවුණා කියල යන්තරේ අලුත් කරන්න කියල ආයෙ මගෙ ළඟට එන්න එපා කියල. ඒ දක්‍ෂ මනෝ වෛද්‍යවරයා දමන තහංචිය අකුරටම පිළිගන්න රෝගියාගේ තත්ත්වය දවස්‌ 21 ක්‌ මාස 3 ක්‌ කිලි අහුකරගන්න එපා කියන වදන් තුළින් උපක්‍රමශීලීව රෝගියා සුවපත් කිරීමට කිල්ල උපයෝගී වන බව නවීන විද්‍යාව තුළින්ද තේරුම්ගත හැක.

ශල්‍ය රෝගියකුට, සමේ රෝග, බිබිලි, තුවාල, වණ, දද, කුෂ්ඨ ඇති රෝගියකුට මෙවැනි කිලි තහංචි දමන දේශීය මනෝ වෛද්‍ය කට්‌ටඩි මහතා, ඇදුරා, ගුරුන්නාන්සේ, යකදුරා යන නම්වලින් හඳුන්වන ශේ්‍රෂ්ඨ පුද්ගලයා කරන නිහඬ සේවය හඳුනා ගන්නා පිරිස නැති තරම්ය. ඉහත රෝගීන් මළ ගෙදරක, වැදූ ගෙදරක, මල්වර ගෙදරක යැමෙන් ඒ ස්‌ථානවල ඇති විෂ බීජ හා මළ සිරුරකින් නිකුත් වන බැක්‌ටීරියා තුවාලවලට ඇතුළු වීමෙන් ඒවා වැඩිවන බව නවීන විද්‍යාවේද දැක්‌වේ. උණසන්නිපාතය, පාචනය වැනි රෝග ආහාර දිරවන ඉන්ද්‍රිය පද්ධතියේ ඇති විට ඝන ආහාරයක්‌ (දිරවීමට අපහසු) උදරයට වැටීමෙන් ආමාශය සංකෝචනය කර දෙන්නට අපහසු නිසා රෝගියාගේ තත්ත්වය උත්සන්න වේ. එවැනි රෝගියකුට ග්‍රහ තත්ත්වය විමසා යන්ත්‍ර පළඳවන අතිදක්‍ෂ දේශීය මනෝ වෛද්‍ය කට්‌ටඩි මහතා තහංචි දමා රෝගීන් බේරා ගන්නා අවස්‌ථා බොහෝය.

නියම ආකාරයට ඖෂධත් ලැබෙනව. අපලවලට අවශ්‍ය ශාන්ති කර්මත් කළා. හැබැයි කිලි කුණු වලින් පරිස්‌සම් වෙන්න ඕන. සති 3 ක්‌ (දින 21 ක්‌) අලකොළ, මියන කොළ, අළු පුහුල්, අළු කෙසෙල්, ඌරු, වඳුරු, මොනර, මෝරන්, මගුරන් කියන මස්‌ මාළු කන්න එපා. කෑවොත් යන්තරේ බල බිඳෙයි. මේ සියලු ආහාර දිරවීමට ඉතා අපහසු ආහාර. මේවා ආහාරයට ගත් විට දිරවීමට ඇති අපහසුව නිසා රෝගී තත්ත්වය වැඩිවේ. එයින් වළක්‌වා රෝගියා බේරා ගැනීමට මේ යකදුරා දමන තහංචිය තුළින් රෝගියා සුවපත් කිරීමට ඔහු යොදාගන්නා උපාය මාර්ගය කොතරම් අගනේද?

කරුණු මෙසේ හෙයින් කිලි පහරකර ගැනීම විද්‍යාත්මකවද පිළිගැනීමට හැකියාව ඇත. අගුණ දේ අහිතකර දේ කිල නම් මත්වතුර සහ දුම්වැටිද කිලි ගණයට දැමීමේ වරදක්‌ නැත. වසර දහස්‌ ගණනකට පෙර සිටි අපේ සෘෂිවරුන් නවීන විද්‍යාඥයන්ට වඩා ප්‍රගුණ කළ බුද්ධියක්‌ ඇති විද්‍යාඥයන් සේ පිළිගත හැකි අතර අති විශිෂ්ට ස්‌වයං ඥනයෙන් සිතා බලා ගුරු පරම්පරාවෙන්, පුස්‌කොළ පොතින් එන සෘෂි මත හණ මිටි ගණයට නොදමා වැඩිදුර පරීක්‍ෂණ කටයුතුවලින් අනතුරුව දේශීය වෛද්‍ය ක්‍රමය හා එහි වැදගත්කම මුළු ලොවටම ලබාදීම ලෝවාසී සැමට හිතකර වනු ඇත.

උපුටා ගැනීම දිවයින