නිවෙසේ නිදන කාමරයට මුළුතැන්ගෙට සුදුසු දිශා
- ප්‍රධාන නිදන කාමරය නිරිත දිශාවට සුදුසුයි
- ගිනිකොන දිශාවේ මුළුතැන්ගෙය ආදායම වර්ධනයට හොඳයි
නිවසක නිදන කාමරය සහ මුළුතැන්ගෙය ඉතාම වැදගත් අංග දෙකකි. අඹුසැමියන්ගේ එකතුව, එකමුතුව, ශක්තිය, ආදරය, පැවැත්ම සියල්ල රඳා පවතින්නේ නිදන කාමරය තුළ වන අතර බිරිය වැඩි කාලයක් ගත කරන ස්ථානය වන්නේ මුළුතැන් ගෙයයි. මෙම ස්ථාන දෙකේ පවතින වාස්තු දෝෂ නිවසේ ප්‍රධානීන් දෙදෙනාට සෘජුව බලපෑම බැවින් එවන් තත්ත්ව සමස්ත පවුල් සංස්ථාවම දෙදරා යාමට හේතු වේ.එබැවින් වාසනාවන්ත පවුලක් උදෙසා වාස්තු දෝෂ නොමැති නිදන කාමරයක් සහ මුළුතැන්ගෙයක් ඔබ නිවසේ තිබේදැයි අද සළකා බලමු.
යම් හෙයකින් ඔබේ නිවසේ එම ස්ථාන දෝෂ සහගත නම් ඒවා නිවැරදි කරගෙන ජීවිතය සාර්ථක කර ගන්න.
ඔබේ නිවසේ මුළුතැන්ගෙය පිහිටා ඇත්තේ නිරිත හෝ ඊසාන දිශාවක නම් එය ඉතාමත් අසුබදායකය. එය නිවැසියන්ට ලෙඩ රෝග බහුල වීමට හේතුවක් වන අතර කිසි විටෙක නිවසේ යට තට්ටුවේ නිරිතේ මුළුතැන්ගෙයත්, උඩ තට්ටුවේ නිරිතේ ප්‍රධාන නිදන කාමරයත් ඉදි නොකළ යුතුය. මුළුතැන්ගෙයට උඩින් හෝ යටින් නිදන කාමර ඉදි නොකළ යුතුය.
නිවසේ ප්‍රධාන නිදන කාමරය සුදුසු වන්නේ නිරිත දිශාවටය. නිරිත දිශාවේ ප්‍රධාන නිදන කාමරය ඇත්නම් නිවැසියන්ට ලෙඩ රෝග අඩු වේ. හැමවිටම නිදා ගන්නා විට නැගෙනහිරට හිස දැමිය යුතුය. උතුරට හිස දමා නිදා ගැනීම සතුටට බාධාවකි .පෘථිවියේ පවතින චුම්බක ක්ෂේත්‍රය අනුව ඊසානට, උතුරට හිස තබා නිදා ගැනීමෙන් මොළයේ ඇල්ෆා, බීටා ශක්තීන් වෙනස්වීම ඊට හේතු වේ. නාන කාමරය දෙසට හිස දමා නිදා ගැනීම නොකළ යුතුය.ජනේලයක් පැත්තට හිස දැමීමත්, බොක්ස් ඇඳන් පාවිච්චි කිරීමත් නුසුදුසුය.
ලිංගික සතුට කෙරෙහි නිදන කාමරයේ බෙහෙවින් බලපායි. ලිංගිකත්වය ජීවවිද්‍යාත්මක සහ මානව ක්‍රියාකාරකමකි. එම නිසා අලුත විවාහ වූ අය ඊසාන හෝ ගිනිකොණ කාමරවල නිදා ගැනීමෙන් ජීවිතයේ සතුට, ප්‍රීතිය කෙරෙහි අසුබ බලපෑම් ඇති වේ.
එමෙන්ම නිවසේ මුළුතැන්ගෙය තිබෙන දිසාව ද ඉතාම වැදගත්ය. මුළුතැන්ගෙය උතුරු දිශාවේ පිහිටීම ආදායම් මාර්ග ඇණ හිටීමට හේතුවක් වේ. මුළුතැන්ගෙය ඊසානයේ පිහිටීම රැකියා අහිමි වීමට, ව්‍යාපාර කඩා වැටීමට හේතුවකි. මුළුතැන්ගෙයි උතුරට හෝ ඊසානට ලිප දැල්වීම සුදුසු නැත.
ආදායමට බලපාන හොඳම දිශාව වන්නේ ගිනිකොණයි. ගිනිකොණ දිශාවේ මුළුතැන්ගෙය සහ ගිනිකොණමුල්ලේ ලිප ඇත්නම් එය නිවසේ තැන්පත් ධනය වර්ධනයට හේතුවකි.එය නිවසේ ආදායම් මාර්ග දියුණු වීමටද හේතුවක් වේ.
නිවසේ මුළුතැන්ගෙය ගිනිකොණ දිශාවේ ඉදි කළ නොහැකි නම් සුදුසු වන්නේ වයඹ දිශාවයි. වයඹ වායුවට අධිපති දිශාව වේ. වායුව සහ ගින්දර මිතුරු බැවින් වයඹ දිශාවේ මුළුතැන්ගෙය පිහිටීමෙන්ද ආදායම් මාර්ග විවර වේ. ජලය සහ ගින්දර එක ළඟ තැබීම ආදායම් මාර්ගවලට බාධාවක් වන නිසා ලිප සහ ජල කරාමය අතර දුර අඩි හයක් වත් විය යුතුය.එමෙන්ම පෝරණුවට ඉහළින් ජල ටැංකිය තැබීමද එතරම් සුබ නැත. එමගින් පරිසරය අසමතුලිත වීම නිසා මානසික ආතතිය, අධික කෝපය, ධන වර්ධනය අඩුවීම ආදිය ඇති වේ.
මුළුතැන්ගෙයි කෑම මේසය බස්නාහිරට තැබීමෙන් කෑම හිඟයක් ඇති නොවේ. ගෑස් ලිප බිත්තියේ ගෑවෙන ලෙස තැබීම ගෙදර නිතර අඬ දබර, ආර්ථික ප්‍රශ්න ඇතිවීමට හේතු වේ. මැටියෙන් තැනූ වතුර කළයක්, ගුරුලේත්තුවක් උතුරු දිශාවෙන් හෝ මුළුතැන්ගෙයි ඊසාන දිශාවෙන් තැබීම ඉතා සුබදායකය. මුළුතැන්ගෙයි ශීතකරණය නිරිතට හෝ බස්නාහිරට සුබයි. හාල්, සීනි, වියළි ආහාර හා පළතුරු ආදිය දකුණ,නිරිත, බස්නාහිර දිශාවල තැබීමෙන් නිවසේ කෑම හිඟ නොවේ.
රයිස් කුකර්, බ්ලෙන්ඩර්, කේතල් ආදි විදුලි උපකරණ ගිනිකොණ දිශාවේ තැබිය යුතුය. උතුරට,ඊසානට නුසුදුසුය.සින්ක් එක තැබිය යුත්තේ උතුරේය. කිසිම අවස්ථාවක සින්ක් එකේ ඉඳුල් වළං, පිඟන් තබා නින්දට නොයා යුතුය. නව වසරේ මෙබඳු නිවැරදි වාස්තු පිළිවෙත් අනුගමනය කිරීම තුළින් ඔබේ නිවසට සිරිකත කැන්දාගෙන ජීවිතය වාසනාවන්ත කරගැනීමට උත්සාහ කරන්න.
උපුටා ගැනීම සිළුමිණ
